انصار (یکشنبه، د میزان ۲ مه) د قطر صدراعظم وايي، په کندهار کې یې د طالبانو له مشر سره په کتنه کې په زغرده هغه ته وویل چې «د قطر په شان یو عصري هیواد شئ.»
د قطر امیر لومړنی بهرنی مشر و چې د سږ کال په مې میاشت کې یې د طالبانو له مشر ملاهبت الله اخوندزاده سره ولیدل.
محمد بن عبدالرحمن آل ثاني له سي این این سره په ځانګړې مرکه کې کندهار ته د خپل سفر او د طالبانو له مشر سره د کتنې په باب خبرې کړي دي.
ده ویلي چې له ملاهبت الله اخوندزاده سره یې د ښځو د کار او تعلیم په اړه خبرې وکړې، او ورته ویې ویل:«که غواړئ چې د نړیوالې ټولنې برخه واوسئ، پکار ده چې زموږ سره همکاري وکړئ او له یو بل سره په همکارۍ کې د قطر په شان یو عصري هیواد شئ.»
د قطر صدراعظم زیاته کړه:«د طالبانو مشر ته مې وضاحت وکړ چې د مثال په توګه قطر یو اسلامي هیواد دی چې ښځې پکې اجاره لري او په ویاړ په ټولنه کې برخه اخلي او د هیواد په مشرتابه کې د وزیر او سفیر په توګه ونډه لري، د کار او زده کړو په ټولو سویو کې د نارینه وو ترڅنګ دي.»
ده د طالبانو مشر ته وړاندیز کړی چې په کمه او ټیټه کچه ښځو ته لومړی په ناحکومتي موسسو کې د کارکولو اجازه ورکړي چې په افغانستان کې خلکو ته مرستې ورسیږي.
د قطر صدراعظم وايي، مذهبي مشر نه دی چې د طالبانو له مشر سره په دې اړه دیني بحث وکړي خو ټینګار کوي:«قطر یو مسلمان هیواد دی، ښځې پکې کار او تعلیم کوي او د هغوی د کار او تعلیم مخه نه نیسي.» ده په عین حال کې هیله وښوده چې د طالبانو مشر به یې خبرې واوري.
URL تعقيب: https://www.ansarpress.com/pashto/27194
